چیمپئنز ٹرافی سے قبل بھارتی ٹیم کو بڑا دھچکا، جسپرت بمراہ ایونٹ سے باہر

بھارتی کرکٹ بورڈ نے فاسٹ بولر جسپرت بمراہ کی آئی سی سی مینز چیمپئنز ٹرافی 2025 میں عدم شرکت کی تصدیق کردی۔ بمراہ کو گزشتہ مہینے سڈنی میں آسٹریلیا کے خلاف آخری ٹیسٹ میچ کے دوران کمر کے نچلے حصے میں انجری ہوئی تھی، جس کی وجہ سے وہ ٹورنامنٹ میں حصہ نہیں لے سکیں گے۔

بھارتی کرکٹ کنٹرول بورڈ (BCCI) کے ایک بیان کے مطابق، سلیکشن کمیٹی نے بمراہ کی جگہ تیز گیند باز ہرشیت رانا کو ٹیم میں شامل کیا ہے۔ یہ دوسرا آئی سی سی ٹورنامنٹ ہے جس سے بمراہ انجری کی وجہ سے محروم ہوں گے۔

اس سے قبل وہ 2022 کے ٹی20 ورلڈکپ سے بھی باہر ہو گئے تھے، جس کے بعد انہیں سرجری کروانی پڑی تھی۔

اس کے علاوہ بھارتی ٹیم میں اسپنر ورون چکرورتی کو یشسوی جیسوال کی جگہ شامل کیا گیا ہے۔ جیسوال اصل میں عارضی ٹیم کا حصہ تھے۔

چیمپئنز ٹرافی کیلیے بھارتی ٹیم

روہت شرما (کپتان)، شوبمن گل (نائب کپتان)، ویرات کوہلی، شریاس آئیر، کے ایل راہول (وکٹ کیپر)، رشبھ پنت (وکٹ کیپر)، ہاردیک پانڈیا، اکشر پٹیل، واشنگٹن سنڈر، کلدیپ یادو، ہرشیت رانا، محمد شامی، ارشدپ سنگھ، رویندر جڈیجا، ورون چکرورتی۔

اسکواڈ میں یشسوی جیسوال، محمد سراج اور شیوام دوبے کو متبادل کھلاڑیوں کے طور پر شامل کیا گیا ہے اور وہ بوقت ضرورت دبئی روانہ ہوجائیں گے۔