مقبوضہ کشمیر؛ ٹریفک حادثوں میں 14 افراد ہلاک اور 20 زخمی

سری نگر: مقبوضہ کشمیر میں دو مختلف ٹریفک حادثات میں مسافر بردار بس اور کار کے کھائی میں گر جانے سے مجموعی طور پر 14 افراد ہلاک اور متعدد زخمی ہوگئے۔

بھارتی میڈیا کے مطابق پہلا حادثہ جموں کے ضلع جھجر میں پیش آیا جہاں مسافر بردار بس ایک خطرناک موڑ کاٹتے ہوئے ڈرائیور سے بے قابو ہوکر گہری کھائی میں گر گئی۔ اس حادثے میں 8 افراد ہلاک اور 20 زخمی ہوگئے۔

حادثے میں زخمی ہونے والے 20 افراد کو قریبی اسپتال منتقل کیا گیا جہاں 6 زخمیوں کی حالت تشویشناک ہونے کے باعث ہلاکتوں میں اضافے کا خدشہ ظاہر کیا جا رہا ہے۔
دوسری جانب ڈوڈہ ضلع سے جموں جانے والی ایک کار بھی 300 گہری کھائی میں گر گئی جس میں ایک ہی خاندان کے 6 افراد ہلاک ہوگئے جن میں ایک ڈاکٹر بھی شامل ہیں۔

دونوں حادثات کی وجہ تیز رفتاری کو قرار دیا جا رہا ہے تاہم اس علاقے میں کئی خطرناک موڑ اور سڑک کی ابتر حالت بھی ٹریفک حادثات کی وجہ ہیں۔

ضروری کارروائی کے بعد لاشیں اہل خانہ کے حوالے کردی گئیں۔