سمندر پار پاکستانی ’امپورٹڈ حکومت‘ کے خلاف مظاہرے اور سوشل میڈیا پر مہم چلائیں، عمران خان

اسلام آباد: پاکستان تحریک انصاف (پی ٹی آئی) کے چیئرمین اور سابق وزیر اعظم عمران خان نے سمندر پار مقیم پاکستانیوں سے حکومت مخالف مہم میں تعاون مانگتے ہوئے انہیں سوشل میڈیا پر مہم، مظاہروں اور عوامی نمائندوں کو خط لکھنے کی ہدایت کردی۔

اوور سیز پاکستانیوں سے آن لائن خطاب میں عمران خان نے اوور سیز میں مقیم پی ٹی آئی کے حامیوں اور تمام پاکستانیوں کو ہدایت کی کہ وہ اپنے ممالک کے عوامی نمائندوں کو خط لکھ کر مداخلت کے حوالے سے سوال کریں اور ہماری جدوجہد کو کامیاب بنانے کے لیے چندہ بھی بھیجیں۔

انہوں نے کہا کہ پاکستان میں حکومت کے خلاف ہونے والی سازش کے خلاف عوامی احتجاج قابل تعریف ہے، پہلی بار پاکستانیوں کا یہ جذبہ دیکھا جو کسی بھی صورت غلامی کے لیے تیار نہیں بلکہ آزاد پاکستان کے خواہش مند ہیں۔
سابق وزیر اعظم اور پاکستان تحریک انصاف (پی ٹی آئی) کے چیئرمین عمران خان نے کہا ہے کہ وہ کبھی امریکا یا یورپ کے مخالف نہیں رہے ہیں اور ہمیشہ دوستی کے خواہاں ہیں لیکن امریکا پاکستان سے روس سے تیل کی کم قیمت طے کرنے کے معاملے پر ناراض ہوا کیونکہ امریکا کو پاکستان میں آزاد حکومت کی عادت نہیں ہے۔

انہوں نے ایک مرتبہ پھر کہا کہ ’حکومت ہٹا کر نااہل لوگوں کو لایا گیا اور حکومت گرانے کے لیے سندھ ہاؤس میں ’لوٹوں کی منڈی‘ لگائی گئی، ماضی میں مشرف امریکی دھمکی برداشت نہ کرسکا اورافغان جنگ میں کود گیا، نائن الیون سے پاکستان کا کوئی لینادینا نہیں تھا مگر پاکستان کو بڑے پیمانے پر جانی و مالی نقصان کا سامنا کرنا پڑا، جس میں ہماری 80 ہزار لوگ جانوں سے گئے۔

پی ٹی آئی چیئرمین نے اس خواہش کا اظہار کیا کہ ادارے آج یہ جان لیں کہ قوم ‘امریکی سازش’ کے بیانیے پر کہاں کھڑی ہے اور اُس کی خواہش کیا ہے۔

عمران خان نے سیاسی مخالفین کو مخاطب کرکے کہا کہ امریکا میں پاکستانی سفیر کو ڈونلڈلو نے بلا کردھمکی دی تھی، حکومت میں آنے والے لوگ دنیا میں کہیں بھی چلے جائیں غدار اور چور کے نعرے لگیں گے، یہ کرپٹ لوگ ہیں وزیراعظم بننے والے شخص کے خاندان پر40 ارب روپے کی کرپشن کے کیسز ہیں۔

انہوں نے کہا کہ بیرون ملک ہاتھ پھیلا کر پیسے مانگنے سے شرم آتی تھی لیکن میں نے پاکستان کے لیے پیسے مانگے، بدقسمتی سے ہماری حکمران اشرافیہ کرپٹ، نرم مزاج اور غلام ہے اور وہ سمجھتی ہے کہ ہم امریکا کے بغیر زندہ نہیں رہ سکتے۔

علاوہ ازیں ان کا کہنا تھا کہ ہمارے روس کے ساتھ ہی گیس سے متعلق گفت وشنید پہلے سے چل رہی تھی اور روس کی جانب سے تیل کی قیمت کم طے کرنے کے معاملے پر امریکا ناراض ہو گیا اور پھر سازش تیار ہوئی جس کے بعد ہمارے خلاف میر جعفر اور میر صادق ان سے مل گئے۔

عمران خان نے کہا کہ بھارت نے امریکا کے ساتھ قریبی تعلقات کے باوجود روس سے بات چیت کی اور سستی قیمت پر تیل حاصل کیا لیکن ہمارے روس کے دورے نے مغرب کو ناراض کیا، واشنگٹن نے دہشت گردی کے خلاف جنگ کے دوران ہماری (پاکستان) کی مدد کی کوششوں کو کبھی نہیں سراہا اور اب وہ ہمیں دھمکیاں دے رہے ہیں۔