پی ایس ایل کے التوا پر بورڈ ذمہ داری قبول کرے، حفیظ

پی ایس ایل کے التوا پر بورڈ ذمہ داری قبول کرے، حفیظ
Spread the love

کراچی: محمد حفیظ نے بورڈ سے پی ایس ایل کے التوا کی ذمہ داری قبول کرنے کا مطالبہ کردیا، وہ کہتے ہیں کہ جب آپ چھوٹی چیزوں کا کریڈٹ لیتے تو بڑے واقعات کی ذمہ داری بھی قبول کریں، سارا ملبہ کسی ایک پر ڈالنا درست نہیں، باہمی سیریز میں فتوحات کا ٹی 20 ورلڈ کپ میں فائدہ ہوگا۔

تفصیلات کے مطابق پاکستان سپر لیگ 6 کو کورونا وائرس کیسز سامنے آنے پر ملتوی کردیا گیا تھا, بائیوببل قوانین کی خلاف ورزی کے حوالے سے تحقیقاتی پینل اپنی رپورٹ 31 مارچ کو پی سی بی کے چیئرمین احسان مانی کو دے گا۔ بورڈ کے میڈیکل ہیڈ ڈاکٹر سہیل سلیم پہلے ہی ذمہ داری سے الگ ہوچکے ہیں۔

تاہم آل راؤنڈر محمد حفیظ سمجھتے ہیں کہ بورڈ بھی اس معاملے میں اپنی ذمہ داری قبول کرے۔ ایک یوٹیوب چینل کو انٹرویو میں ان کا کہنا تھا کہ یہ بہت ہی بدقسمتی کی بات ہے، ایک پاکستانی اور کرکٹر ہونے کے ناطے ہم نے ملک میں کرکٹ کی واپسی کیلیے اپنا کردار ادا کیا ہے، آپ اسے مس منیجمنٹ یا بری منصوبہ بندی کہہ سکتے ہیں، جس طرح لوگ چھوٹی چیزوں کا کریڈٹ لیتے اسی طرح انھیں اس طرح کے بڑے واقعات کی بھی ذمہ داری قبول کرنا چاہیے، سب چیزوں کی ذمہ داری صرف ایک شخص پر ڈالنا درست نہیں، ہمیں سمجھنا چاہیے کہ اس سے ہماری ساکھ متاثر ہوئی ہے، ذاتی طور پر مجھے کافی مایوسی ہوئی ہے، ایسا نہیں ہونا چاہیے تھا، مجھے امید ہے کہ آئندہ زیادہ بہتر منصوبہ بندی کی جائے گی تاکہ ایسا پھر نہ ہو۔
رواں برس اکتوبر میں بھارت میں شیڈول ٹی 20 ورلڈ کپ کی تیاریوں کے حوالے سے حفیظ کا کہنا تھا کہ پاکستان ٹیم نے میگا ایونٹ سے قبل جنوبی افریقہ، انگلینڈ اور ویسٹ انڈیز میں سیریز کھیلنی ہیں، ان باہمی سیریز میں فتوحات سے ٹیم کا مورال بلند اور اس کا ورلڈکپ میں فائدہ ہوگا۔

اپنا تبصرہ بھیجیں