ذبیح اللہ مجاہد کی والدہ کے ایصال ثواب کے اجتماع پر دھماکا، متعدد ہلاکتوں کا خدشہ
کابل: امارت اسلامیہ افغانستان کے دارالخلافہ کی ایک عید گاہ پر زوردار دھماکا ہوا ہے جس میں متعدد ہلاکتوں کا خدشہ ظاہر کیا جا رہا ہے۔
عالمی خبر رساں ادارے کے مطابق افغانستان کے دارالحکومت کابل میں ایک عید گاہ پر زوردار دھماکا ہوا ہے جس کے بعد فائرنگ کی آوازیں بھی سنی گئی ہیں۔ دھماکے میں متعدد ہلاکتوں کا خدشہ ظاہر کیا جا رہا ہے۔
الجزیرہ کے مطابق دھماکا جس عید گاہ کے مرکزی دروازے پر ہوا وہاں نائب وزیر اطلاعات ذبیح اللہ مجاہد کی والدہ کے ایصال ثواب کے لیے اجتماع کا انعقاد کیا گیا تھا۔
تاحال کسی گروپ نے حملے کی ذمہ داری قبول نہیں کی ہے تاہم طالبان کے اقتدار سنبھالنے کے بعد سے ہونے والے ہر خودکش حملے یا بم دھماکوں کی ذمہ داری داعش خراسان نے قبول کی ہے۔
طالبان کے ترجمان کی جانب سے بھی عید گاہ پر دھماکے کی تصدیق کرتے ہوئے کہا گیا ہے کہ حملے میں متعدد افراد کی ہلاکتوں کا خدشہ ہے۔
